Cerita Singkat Dodeng Massudi Lalong Dalam Bahasa Toraja

TONDOK TORAYA - Siapa yang tidak mengenal cerita Toraja ini yang yaitu Dodeng, dimana mengisahkan 2 orang pasangan yang rela hidup semati.

Nah kali lebih lanjutnya berikut ini Cerita Singkat Dodeng Massudi Lalong dalam bahasa Toraja..

"Massudi Lalong-Dodeng-Lebonna"

Ia tonna pissan, tonna allo-allonapa kasirarian, den da’dua tau, muane sia baine sangkalamma’. Paerengan ba’tu disangan Massudi Lalong sola Lebonna. Ia tonna lamalemo parari te Paerengan, sielle’mi basse sola duai kumua la sangtuo sangmatei, tuo pada tuo, mate pada mate.

 

Malemi ade’ te Paerengan parari sola to sang tondokan na den asunna Paerengan undi duka. Tonna mangkamo parari, ma’pangnganmi te Paerengan nakattuduimi ade’ tu asunna na mararang bulunna. Dolomi ade’ sule te asunna Paerengan umpellambi’ Lebonna.

 

Nakuami tau, “Matemo tu Paerengan. Den rarana jo to’ bulu asunna.” Ia tonna mangkamo narangngi kumua matemo tu Paerengan, simpolo malemi mentuyo te Lebonna. Tae’ namasai to, naappai’ tau tu batang rabukna nakaburui’.

Den sangbanuanna Lebonna tu solana duka Paerengan disanga Dodeng. Iate Dodeng to mamba’ta tuak. Malemi ade’ la mangrambi mayang jo to’ induk sikandappi’ kaburu’na Lebonna. 

 

Ia tonna mangrambi mayangmi tu Dodeng, kendekmi ade’ tu bombona Lebonna na menani nakua:

DODENG MA’RAMBI MA’DEDEK DODENG MA’PATUANG-TUANG
RAMPANANPI PEDEDEKMU ANNA TIPEPAMARU’MU
AMMU PERANGNGINA’ MATI’
AMMU TANDING TALINGANA’
PARAMPOANNA’ KADANGKU PEPASAN MASSE-MASSEKU
LAKO TO MASSUDI LALONG MUANE SANGKALAMMA’KU
MUKUA DUKA’ LA SANGMATEKI’ E SO’ E
PAERENGAN OH RENDENKU..
ANGKU DOLO AKU MATE ANGKU MA’PALIU’ AKU
TAE’ SIA LA MATEMU LASISARAKNA SUNGA’MU
KANDEAN BO’BO’MO LEBON
RIMBAKAN POTEBOLONGNA
ULLI’-ULLI’ SOLA DIKKAN BORROAN SITO’DOAN MO
KARIUANMO LALANNA TARUKANMO PESSULEANNA

Ia tonna rangngimi Dodeng tu penanianna Lebonna, mengkalaomi ade’ dodeng domai to’ induk. Masiangna to, sulemi ade’ te Paerengan jo mai padang kasirarian, apako tae’pa natandai sia tae’ tau umpokadanni kumua matemo tu Lebonna.

 

Malemi ade’ Dodeng lako Paerengan na ma’kada, “O Ambe’, la morai komi raka mangngiru’ tuak?”. Nakuami Paerengan, “Oh iyo…lamoraina’”. Nakuami Dodeng, “ Kumale mira melendong ta pangngirusanni dako’ bongi. Den duka oni manuk-manuk maballo liu la kuparangngian komi!!!!”.

Ia ade’ tonna mabongimo sae, malemi ade’ sola duai mangngiru’ lako to’ indukna Dodeng sa’de kaburu’na Lebonna. Nakuami Paerengan, “Umba raka tu oni manuk-manuk maballo la muparangngianna’??”.

 

Mebalimi Dodeng, “Kampaimi Ambe’, kumalepa urrambi mayang dolo”. Metteka’mi ade’ te Dodeng langngan induk na mangrambi mayang. Ia tonna rambimi tu mayang, kendekmi ade’ bombona Lebonna menani, nakua:

DODENG MA’RAMBI MA’DEDEK DODENG MA’PATUANG-TUANG
RAMPANANPI PEDEDEKMU ANNA TIPEPAMARU’MU
AMMU PERANGNGINA’ MATI’
AMMU TANDING TALINGANA’
PARAMPOANNA’ KADANGKU PEPASAN MASSE-MASSEKU
LAKO TO MASSUDI LALONG MUANE SANGKALAMMA’KU
MUKUA DUKA’ LA SANGMATEKI’ E SO’ E
PAERENGAN OH RENDENKU..
ANGKU DOLO AKU MATE ANGKU MA’PALIU’ AKU
TAE’ SIA LA MATEMU LASISARAKNA SUNGA’MU
KANDEAN BO’BO’MO LEBON
RIMBAKAN POTEBOLONGNA
ULLI’-ULLI’ SOLA DIKKAN BORROAN SITO’DOAN MO
KARIUANMO LALANNA TARUKANMO PESSULEANNA

Mengkalaomi ade’ tu Dodeng. Nakuami Dodeng, “Mirangngimo raka Ambe’ tu oninna manuk-manuk maballo?”. Mebalimi Paerengan, “Oh..iyo le’….mellong tongan ia tu oninna!!!”.

Ia tonna mangkamo mangngiru’ to, sulemi ade’ na rampo lako mintu’ ambe’ tondok sia to parengnge’ metamba, nakua, “ Rampo nasang komi lako banuangku masiang. La merokna’. 

 

Pantan bawa komi dokemi!!!”. Masiangna to, rampo nasangmi ade’ tau lako banuanna Paerengan sibawa doke la merok. Nakuami Paerengan, “Patorro siapi tu dokemi lo’ pollo’ banua mipatungarai langngan tu mata dokemi”. 

 

Napogau’mi tau susi to napokadanna Paerengan. Ia tonna marassanmo tau kumande, simpolo mellatta’ ade’ Paerengan domain banua na mentuyo do to’ doke tungara. Matemi te paerengan.

La dikaburu’mi ade’ te Paerengan na ditunuan tedong sia bainna. Na bullemi ade’ tau te batang rabukna Paerengan la dikaburu’ apa iake dipatamai liang, sule ade’ melolin-lolin tu batang rabukna lako to’ banuanna. 

 

Nakuami tau, “Oh, umbai la sulepa unnala tu tedong salekona sia balianna.” Natunu omi ade’ tau tu tedong saleko sola tedong balianna Paerengan. 

 

Mangka to, male omi dibulle tu batang rabukna Paerengan lako to’ liang. Apa ia tonna mangkamo nakaburu’ tau, sule bangsia ade’ melontin-lontin tu batang rabukna Paerengan lako to’ banuanna. 

 

Nakuami tau, “Oh…mbai la sulepa unnala umanna!!!”. Napamalemi ade’ tau tu umanna Paerengan. Mangka to, male omi ade’ tau umbullei lako liangna. Apa tontong bangsia sule melontin-lontin tu batang rabukna Paerengan lako banuanna. Rampomi ade’ Dodeng na ma’kada, “ Susi te,…benna’ na aku ungkaburui’ misa-misa. Ianna denpa eananna lamipamaleanni, ben bangmo’ to. 

 

“ Napekaioimi ade’ tau tu kadanna Dodeng. Iatu eananna Perengan tu torronapa to, denpa tedong, uma sia bulawan. Malemi ade’ nakaburu’ misa Dodeng tu batang rabukna Paerengan. 

 

Nakaburu’ jo to’ sa’dena Lebonna. Mangka nakaburu’ to, tae’mi nasule tu batang rabukna Paerengan lako banuanna. Dadi iatu mintu’ eananna Paerengan tu torronapa diben nasang Dodeng.